ဘင်ဖီကာနှင့် ကစားသည့် ချန်ပီယံလိဂ် ပွဲစဉ်တွင် အထူးလက်စွမ်းပြခဲ့ပြီးနောက် မန်ချက်စတာ ယူနိုက်တက် ဂိုးသမား အန်းဒရက်စ် လင်ဒါဂါ့ဒ်က ဒေးဗစ်ဒီဂီယာလက်မှ နံပါတ်၁ ဦးစားပေး ဂိုးသမားနေရာကို ရယူရန် အသင့်ဖြစ်နေပြီဟု ပြောကြားလိုက်သည်။ ဒိန်းမတ်လက်ရွေးစင် ဂိုးသမားသည် ဘင်ဖီကာ၏ အိမ်ကွင်းတွင် (၁)ဂိုးစီ သရေကျသော ပွဲတွင် ထူးထူးချွန်ချွန် လက်စွမ်းပြ ကာကွယ်မှုများ ပြုလုပ်ခဲ့သည်။ အင်္ဂလန် ချန်ပီယံ ယူနိုက်တက်သည် အက်ဒွင်ဗန်ဒါဆား အနားယူသွားပြီးနောက် စပိန်ကလပ် အက်သလက်တီကို မက်ဒရစ်မှ အသက်(၂၀)အရွယ် လူငယ်ဂိုးသမားလေး ဒီဂီယာကို ခေါ်ယူထားပြီး ဦးစားပေးဂိုးသမားအဖြစ် သတ်မှတ်ထားသည်။ သို့သော်လည်း ဒီဂီယာသည် အင်္ဂလန် ကစားဟန်နှင့် ရုတ်တရက် အံမ၀င်ဘဲ ဖြစ်နေသေးပြီး ပရီးမီးယားလိဂ် အစောပိုင်း ပွဲစဉ်များတွင် အမှားများ ရှိနေခဲ့သည်။ ယခုအခါ အသက်(၂၇)နှစ်ရှိ လင်ဒါဂါ့ဒ်က ၎င်းသည် အိုးလ်ထရက်ဒ်ဖို့၏ ဂိုးပေါက်ကို လုံခြုံစွာစောင့်ကြပ်ရန် တာဝန်အပေါ် အပြည့်အ၀ မျှော်လင့်နေပြီဟု ပြောကြားခဲ့သည်။ “ကျွန်တော် ဒုတိယဂိုးသမား နေရာမှာ ပျော်ရွှင်မနေပါဘူး။ ကျွန်တော် အင်္ဂလန်ကို ရောက်လာတာဟာ နံပါတ်(၁) နေရာအတွက်ပါ”ဟု လင်ဒါဂါ့ဒ်ကဆိုသည်။ ၎င်းက ယူနိုက်တက်သို့ ပြောင်းရွှေ့ခွင့် ရလာခြင်းကြောင့် ပိုမိုလက်စွမ်းတက်လာကြောင်းနှင့် ယူနိုက်တက် မန်နေဂျာ ဆာအဲလက်စ် ဖာဂူဆန်ထံမှ အကောင်းဆုံး အကူအညီများ ရရှိခဲ့ကြောင်း ဖွင့်ဟပြောဆိုသွားသည်။
Rangoon Time
0 comments:
Post a Comment
ရေးချင်တာလေးတွေရေးရအောင်