တောင်ကိုရီးယား နိုင်ငံရဲ့ ဆွန်းဒို မြို့ပြစီမံကိန်း

မြို့ပြ အသစ် တွေကို ဖန်တီး တည်ဆောက် လာကြတယ်။ ယခုတင် ပြတဲ့ မြို့ပြ အသစ်ဟာ လက်စ မသတ်ရ သေးပေမယ့် လူဦးရေ ၂၀ဝ၀ဝ ခန့် နေထိုင် နေကြပြီလို့ ဆိုတယ်။ ဒါက အနောက်မြို့ပြတွေအတွက် နည်းပညာ အမြင့်မားဆုံး အိမ်ခြံမြေဈေးကွက် ဖြစ်လာလိမ့်မယ်။
ဆွန်းဒိုမြို့ပြရဲ့ လမ်းတွေဟာ ကန္တာရ ဆန်လွန်းတယ်။ ဒီမြို့ပြဟာ အနာဂတ် မြို့ပြ ဖြစ်တယ်။ ၂၀၁၂ နှောင်းပိုင်းမှာ နောက်ထပ်ရောက် ရှိလာမယ့် လူဦးရေ ၅၀ဝ၀ ထပ်ဆောင်းရင်တော့ ၂၇၀ဝ၀ ခန့် ရှိလာ လိမ့်မယ်။ ၂၀၁၅ မှာ လက်စသတ်မယ့် ကမ္ဘာ့အဆင့်အမြင့်ဆုံးမြို့တော် မှာ လူဦးရေ ၆၅၀ဝ၀ ရှိလာမယ်လို့ဆိုတယ်။ ဒီမြို့တော်ရဲ့ လမ်းတွေ၊ ဥယျာဉ်တွေနဲ့ မျှော်စင်တွေ တည်ဆောက်တဲ့ စိတ်ကူးဥာဏ်တွေ ကောင်းမွန် တယ်လို့ သုံးသပ်ကြတယ်။
၂.၄ စတုန်ရန်းမိုင် ဧရိယာပေါ်မှာ ဒီမြို့ပြအသစ်ကို တည်ဆောက် နေကြတယ်။ ဆိုးလ်မြို့တော်ရဲ့ အနောက်ဘက် ၃၅ မိုင်ခန့် ကွာဝေး တဲ့ ပစိဖိတ်သမုဒ္ဒရာထဲရှိ လူသားတွေ ဖန်တီးတဲ့ကျွန်းပေါ်မှာ တည်ဆောက် နေခြင်း ဖြစ်တယ်။ ဆိုးလ်မြို့တော်မှရှုမြင်နိုင်တဲ့ အဲဒီမြို့ပြမျိုးတွေဟာ အမေရိကန်နိုင်ငံမှာလည်း ပေါ်ထွက်လာလိမ့်မယ်။ လူသားမျိုးနွယ်တွေ ဟာ ပိုမိုအဆင့်မြင့်တဲ့ မြို့တော်တွေ လိုအပ်လာလိမ့်မယ်။
ကမ္ဘာ့ကုလ သမဂ္ဂအဖွဲ့ကြီးရဲ့ ဟောကိန်းအရဆိုရင် ၂၀၅၀ ပြည့်နှစ်မှာ ကမ္ဘာ့ လူ ဦးရေရဲ့ ၇၀ ရာခိုင်နှုန်းဟာ မြို့တော်တွေမှာ နေထိုင်လိမ့်မယ်လို့ သိ ရှိရတယ်။ အဲဒီအချိန်မှာ ကမ္ဘာ့လူဦးရေ ၉.၂ ဘီလျံရှိတဲ့အနက် ၆.၄ ဘီလျံက မြို့ပြသားတွေ ဖြစ်လာမယ်။ လက်ရှိ အနေအထားမှာလည်း ကမ္ဘာ့လူဦးရေရဲ့ ၅၀ ရာခိုင်နှုန်း ဟာ မြို့ပြတွေမှာ မှီတင်းနေထိုင်ကြတယ်။
တောင်ကိုရီးယား နိုင်ငံရဲ့ ဆွန်းဒို မြို့ပြစီမံကိန်းကို ၂၀ဝ၀ ပြည့်နှစ်မှာ စတင်ခဲ့တယ်။ အကြီးမား ဆုံး အိမ်ခြံမြေ တည်ဆောက်ရေး လုပ်ငန်းကြီးပဲ။ အမေရိကန် အိမ်၊ ခြံ၊ မြေ ကုမ္ပဏီကြီးရဲ့ ရင်းနှီးမြှုပ်နှံမှု အများစု ပါဝင်နေတယ်။ ဒီမြို့တော် မှာ လူသားချင်းမျှသာ ဆက်သွယ်နိုင်မှာ မဟုတ်ဘဲ အိမ်၊ ကား စသ ဖြင့် အရာဝတ္ထုတွေချင်း ချိတ်ဆက်ထားတဲ့ အင်တာနက်စနစ်တပ်ဆင် ထားတယ်။
ဒီမြို့တော်ရဲ့ လမ်းမကြီးတွေ၊ လမ်းသွယ်တွေနဲ့ အဆောက် အဦတွေမှာ အာရုံခံကိရိယာတွေ တပ်ဆင်ထားတယ်။ အဲဒီအာရုံခံကိရိယာ တွေက ပေးပို့တဲ့ဒေတာတွေကို ဗဟိုထိန်းချုပ်ရေးဌာနမှ လက်ခံရယူပြီး ဒီမြို့တော်ရဲ့လမ်း၊ အဆောက်အဦ၊ ယာဉ်ကြောဆိုင်ရာ ပြဿနာတွေကို ရှင်းလင်းပေးမယ်။ မြို့တွင်းမြို့ပြင် အပူချိန်ကိုလည်း ရယူစုဆောင်းပြီး အမြဲလေ့လာဆန်းစစ်သမှု ပြုနေလိမ့်မယ်။
လမ်းတွေမှာ တပ်ဆင်ထားတဲ့ ကင်မရာတွေကလည်း လမ်းဘေးပလက်ဖောင်းပေါ်မှာ လမ်းလျှောက်သူ၊ စက်ဘီးစီးသူ ဘယ်လောက် ရှိတယ်ဆိုတာကို မှတ်တမ်း ရယူပြီး လူအသွားအလာ မရှိတဲ့လမ်းတွေက ဓာတ်မီးတိုင်တွေလို မှိန်ပျပျသာလင်းစေမယ်။ လူသွားအလာများ တဲ့လမ်း တွေကိုတော့ ပိုပြီး တောက်ပ လင်းလက် နေအောင် မြှင့်တင်ပေးလိမ့်မယ်။ ယနေ့မြို့ပြတိုင်းမှာတွေ့ကြုံနေရတဲ့ ယာဉ်ကြောပိတ်ဆို့တဲ့ ပြဿနာကို ဖြေရှင်းနိုင်တဲ့တီထွင်ဆန်းသစ်တဲ့ နည်းလမ်းဖြင့် မြို့ပြကို ပုံစံဒီဇိုင်းဖော် တည်ဆောက်ထားတယ်။
ရေဒီယိုကြိမ်နှုန်းသုံး ခွဲခြားစိစစ်ကိရိယာ (RFID) က မော်တော်ယာဉ် တိုင်းရဲ့ နံပါတ်ပြားတွေနဲ့ ချိတ်ဆက်ထားတယ်။ ဆွန်းဒိုမြို့တော်ရဲ့ အဓိကကျတဲ့ အရာတိုင်းကို အဆင့်မြင့်နည်းပညာနဲ့ ချိတ်ဆက်တည် ဆောက်ထားခြင်းဟာ ထင်ရှားတဲ့ အစိတ်အပိုင်းတစ်ခု အဖြစ် ထင်သာ မြင်သာရှိတယ်။ သဘာဝပတ်ဝန်းကျင်ကို အနည်းငယ်မျှသာ ထိခိုက် စေပြီး မြို့ပြတည်ဆောက်တဲ့ နည်းလမ်းသစ်ကို အသုံးပြုခြင်း ဖြစ်တယ်။
လူသားတွေ လိုအပ်တဲ့ အရေးအကြီးဆုံးလည်းဖြစ် အခြေခံ အကျဆုံး လည်းဖြစ်တဲ့ သဘာဝအရင်းအမြစ် ကတော့ ရေပါပဲ။ ၂၀ဝ၆ ခုနှစ်မှာ ထုတ်ပြန်တဲ့ ကမ္ဘာ့ ကုလသမဂ္ဂရဲ့ အစီရင်ခံစာအရ အမေရိကန်မြို့ပြတွေရှိ လူတိုင်းဟာ နေ့စဉ်ရေပမာဏ ၅၇၅ လီတာ အသုံးပြုနေတယ်လို့ သိရတယ်။ ဒါကြောင့် မြို့ပြတိုင်းဟာ ရေအရင်း အမြစ်တွေကို ထုတ်ယူသုံးစွဲကြလိမ့်မယ်။ ဒါပေမဲ့ ဆွန်းဒိုမြို့တော်မှာ တော့ မိုးရေသိုလှောင်တဲ့စနစ်၊ စွန့်ပစ်ရေ ပြန်လည်သန့်ရှင်းအသုံးပြု ရေးစနစ်တွေ ဖန်တီး ထားတာကြောင့် လက်ရှိမြို့ပြသားတွေရဲ့ရေ အသုံးပြု မှုပမာဏရဲ့ ၁၀ ပုံ ၁ပုံမျှသာရှိလိမ့်မယ်။
အမိုးတွေပေါ်မှာ ဟင်းသီးဟင်းရွက် စိုက်ခင်းတွေ ထားရှိတာကြောင့် အမိုးပေါ်ကျတဲ့ ရေတွေကို အလဟဿ မဖြစ်စေတော့ဘူး။ ဒီစိုက်ခင်းတွေက နေရောင်ခြည်ရဲ့ အပူဓာတ်ကို စုပ်ယူထားတာကြောင့် ပတ်ဝန်းကျင်ကို အေးမြနေစေတယ်။ ဒီမြို့တော်ရဲ့ စွန့်ပစ်ပစ္စည်းအစိုနဲ့ အခြောက်နှစ်မျိုးစလုံးကို တိုက်ရိုက်စွန့်ပစ်ဖျက်ဆီးတဲ့ နည်းစနစ်ဖန်တီးထားတာကြောင့် မော်တော်ယာဉ်တွေနဲ့ သယ်ယူစွန့် ပစ်စရာမလိုအပ်တော့ဘူး။
ဒီမြို့တော် တည်ဆောက်တဲ့ တီထွင်ဆန်းသစ်မှုတွေဟာ အဆင့် မြင့်မြို့တော် တည်ဆောက်ရေး အတွက် အသုံးဝင်တာ မှန်ပေမယ့်အမှန်တ ကယ် ဆန်းသစ် ကွဲပြားပြီ လို့တော့ မပြောနိုင်သေးဘူး။ ယနေ့ကမ္ဘာမှာ စိတ်လှုပ်ရှားဖွယ်ကောင်းတဲ့ မြို့ပြသစ်တည်ဆောက်ရေးတွေစတင်လှုပ်ရှား လာကြပြီ။ အထူးသဖြင့် ဥရောပနဲ့ မြောက်အမေရိက တို့မှာ ထွန်းကားနေ တယ်။
တခြားမြို့ပြတွေမှာလည်း လျှပ်စစ်စွမ်းအင်ထောက်ပံ့မှုနဲ့ အသုံးပြုမှု ဆိုင်ရာ သတင်းအချက်ကို ရယူဖြန့်ဖြူးတဲ့ လျှပ်စစ်လိုင်းပုံစံတွေဖန်တီးထား တဲ့ အခြေခံအဆောက်အဦတွေ ခင်းကျင်းထားကြပြီ ဖြစ်တယ်။ အစ္စရေးအခြေစိုက် ကုမ္ပဏီတစ်ခုကလည်း ကားလမ်းအောက်မှာကိရိယာငယ်တွေ တပ်ဆင်ထားပြီး လျှပ်စစ်ဓာတ်ထုတ်ယူတဲ့ ပုံစံဒီဇိုင်း ရေးဆွဲထားတဲ့ မြို့ပြစနစ်ကို တင်ပြခဲ့တယ်။ မော်တော်ကား မောင်းတဲ့ လမ်းတစ်လျှောက်မှာ မော်တော်ကားရဲ့ ကတ္တရာလမ်းမအပေါ်သက်ရောက် တဲ့ ဖိအားကို အသုံးပြုပြီး လျှပ်စစ်ထုတ်ယူတဲ့ နည်းပါပဲ။
အဲဒီလျှပ်စစ် ကို ဘက်ထရီနဲ့ သိုလှောင်ပြီး ပင်မဓာတ်အားလိုင်းတွေထဲ ပြန်လည် ဖြည့်တင်းပေးတဲ့ စနစ်ဖြစ်တယ်။ လက်ရှိမှာတော့ ရထားလမ်းကွန်ရက် တွေမှာ ဒီကိရိယာတွေအသုံးပြုပြီး စမ်းသပ်လေ့လာနေတယ်။ မြေအောက် မီးရထားလမ်းတွေနဲ့ မျက်နှာကြက်နဲ့ နံရံတွေမှာ တာဘိုင်အငယ်စားလေး တွေကို ချိတ်ဆက်တပ်ဆင်ထားတဲ့ ကွန်ရက်ကိုအသုံးပြုပြီး စမ်းသပ်မှုတွေ လည်း ရှိတယ်။
ဒါကြောင့် အနာဂတ်မြို့ပြတွေကို ဘယ်လိုတည်ဆောက်သင့်သလဲ ဆိုတာကို အဖြေရှာနေကြတယ်။ ဆွန်းဒိုကဲ့သို့ မြို့တော်တွေ တည် ဆောက်တဲ့ အခါမှာ နည်းပညာသစ်တွေကို အသုံးပြုနိုင်ရေးဟာ အဓိက ကျတယ်။ ဒီမြို့တော်တွေဟာ မြို့ပြအဆင့်ကို အံ့ဩဖွယ်မြှင့်တင်ပေး နိုင်မှာဖြစ်ပြီး အနာဂတ်မှာ သက်ရောက်လာမယ့် ဆိုးကျိုးတွေကိုလည်း ကာကွယ်သမှု ပြုလိမ့်မယ်။
ဥရောပမြို့တော်တွေမှာလည်း ပိုမိုသက် သောင့်သက်သာရှိတဲ့ အဆင့်မြင့် မြို့ပြတွေအဖြစ် ဖန်တီးနေကြတယ်။ အမ်စတာဒမ်မြို့တော်ကို ဥပမာပြု တင်ပြနိုင်ပါတယ်။ ဒီမြို့တော်က လည်ပတ်နေတဲ့လုပ်ငန်းတွေနဲ့ အုပ်ချုပ်သူတွေက စွမ်းအင်လုံလောက်မှုကို အားထုတ်ကြိုးပမ်းကြတယ်။ မြို့ပြနည်းပညာသစ်ကို အသုံးပြုပြီး မြို့ပြ သားတွေရဲ့ ပြုမူလှုပ်ရှားမှုကို ပြောင်းလဲပစ်ခြင်းဖြင့် စွမ်းအင်အသုံးပြုမှု သက်သာအောင် ကြံဆကြတယ်။
အဓိကအချက်ကတော့ ကာဗွန်ဒိုင် အောက်ဆိုက် ထုတ်လုပ်မှုကို လျှော့ချရေးပဲ။ ၂၀၂၅ ခုနှစ်မှာတော့ ၁၉၉၀ ပြည့်နှစ် ကာဗွန်ထုတ်လုပ်မှု ပမာဏရဲ့ ၄၀ ရာခိုင်နှုန်း လျှော့ချနိုင်ဖို့ ရည်ရွယ်ထားတယ်။ ဒီလို နည်းပညာသစ်တွေ အသုံးပြုဖန်တီးတဲ့ မြို့ပြသစ်တွေဟာ လူသားတွေအတွက် အကျိုးရှိနိုင်လိမ့်မယ်။ ဒါပေမဲ့ နည်းပညာကို ဇောင်း ပေးထားတာကြောင့် လူမှုရေးဆိုင်ရာ ကိစ္စတွေမှာ ထိခိုက်မှုရှိမလားဆိုတာ ကိုလည်း သုံးသပ်ကြတယ်။
ဒါပေမဲ့ ဒီမြို့ပြသစ်တွေ ပေါ်ထွန်းလာမှာတော့ သေချာတယ်။ တရုတ်နဲ့ အိန္ဒိယမှာလည်း ဆွန်းဒိုလို မြို့ပြသစ် ၂၀ တည်ဆောက်မယ်လို့ ဆိုတယ်။ ပိုမိုကောင်းမွန်ပြီး ပိုမို လျင်မြန်တဲ့အပြင် ကုန်ကျစရိတ်လည်း သက်သာတဲ့ နည်းစနစ်တွေကို နောက်ပိုင်းမှာ ပိုမို အသုံးပြုလာနိုင်မယ်လို့ မျှော်လင့်ရတယ်။ ကမ္ဘာ့လူဦးရေတိုးပွားလာတာ နဲ့အမျှ မြို့ပြသစ်တွေ တိုးပွားလာခြင်းကြောင့် ကမ္ဘာမြေကို ထိခိုက်မှုနည်းတဲ့ နည်းနာသစ်တွေ အသုံးပြုပြီး သဘာဝပတ်ဝန်းကျင်ကို သာယာလှပအောင် ဖန်တီးနိုင်ကြမှာ မလွဲပေဘူး။

ဆောင်းပါးရှင် - ခင်မောင်ဇော်